Kleingoed

Yolandi was vanoggend oppad dokter toe met Joanné en haarself. Langs die pad het hulle agtergekom daar is iets wat Joanné pla. Ja, sy het haar besigheid gou gedoen en behoorlik ook. Klere en stoel vol. Ouma moes badwater intap en nou die klere. Maar o wee, haar pakkie klere was nie in die doeksak nie. Al uitweg, Ruben se ekstra pakkie klere in sy doeksak. As jy nie weet dit is 'n ou dogtertjie nie, kan sy dalk deurgaan vir 'n seuntjie.

Met haar stoeltjie ook vuil, moes sy maar in Annika se stoeltjie sit oppad dokter toe. Kyk net hoe verdwaal lyk sy.

Die besoek aan die dokter het die volgende opgelewer : Joanné is reg, al is sy hees en hoes sy. Yolandi het bloedtoetse vir haar skildklier laat doen en hulle moet ook 'n scan van die skildklier doen. Hiervoor moet sy na Hamilton toe gaan.

Hulle kom by Ouma by die huis en Odélia is nie lekker nie. Haar koors het begin styg en sy het begin kla oor hoofpyn. Terug dokter toe. Sy het 'n keel infeksie. Moet Pamol gee en aangaan met die antibiotika waarop sy is. By die huis aangekom, is haar koors 38 grade. Bel die dokter. Hy skryf toe Brufen voor en Daleen het dit saam uitgevat plaas toe. Ons het nou net met Yolandi gepraat. Na 'n bad en al haar medikasie, is die koors gebreek en is hulle oppad bed toe. Hulle sal haar dophou deur die nag, want as sy weer koors het, moet die dokter haar môre weer sien.

Terwyl ek vanoggend skoongemaak het, kon dit nie hoër of laer nie, Ruben moes die skoppie en besempie kry. Dit lyk my hy moet gereeld by die huis help met die skoonmaak. Klein, maar getrein.

Pieter en ek het oor die naweek kamers geskuif, sodat ons 'n scrapbook kamer kan hê. Nou is die kamer waarin die kot is, die heel eerste kamer as jy by die voordeur inkom (eintlik 'n kantoor). Die twee balle wat Ruben het, is eintlik twee kussings wat op die bed lê. Ek het al vrede gemaak dat dit die kleingoed se speelgoed is.