Nico kuier

Nico het Woensdag vanaf Wellington na Rotorua gevlieg om vir 'n paar dae by ons te kom kuier voordat hy teruggaan Suid-Afrika toe. Ek het my kamera by die huis vergeet en met Johan se selfoon fotos geneem toe hy geland het. Nou sukkel ek om die fotos ge-epos te kry na my rekenaar toe. Ek het maar besluit om die stryd gewonne te gee en plaas hierdie foto van hom om te wys dat hy regtig hier is. Ons het sy kuier baie geniet. Hy sal nou baie kan vertel wanneer hy by die huis is oor wat hy hier gesien en beleef het. Hy vlieg vandag alweer terug Wellington toe en môre Suid-Afrika toe. Baie dankie vir die kuier, Nico. Ons waardeer dat jy hier was en ons het die kuier baie geniet.

Aan al julle ander Suid-Afrikaners, mag Nico julle almal lus maak om vir ons te kom kuier.

Nico en Chanel

.

Chanel se eerste inspuitings

Chanel het Dinsdag haar ses weke ondersoek gehad en ook haar eerste inspuitings - 2 - gekry. Ai dit is darem nie lekker as hulle ingespuit word en jy nie veel kan doen om die eina weg te vat nie. Gelukkig was die bottel naby en het sy gou vergeet van die eina.

Baie verjaarsdae

5 Verjaarsdae vandag!!!!!

Baie geluk met jou 6de verjaarsdag vandag, Chanté. 'n Baie mooi jaar word jou toegewens met pragtige vordering op skool. Hoop jy geniet jou verjaarsdag in Suid-Afrika baie.

Johan Bosman verjaar ook vandag. Baie geluk, Johan. Mag die nuwe lewensjaar alles wat mooi is inhou. Geniet die dag.

Ook vir jou wil ons 'n baie lekker en vreugdevolle verjaarsdag toewens, Lize. Mag die jaar vorentoe besaai wees met alles wat mooi is. Geniet die dag.

Baie geluk ook aan Leana van Wyk en Willie van Niekerk wat ook vandag hul geboortedag herdenk. Mag die nuwe lewensjaar ook vir julle alles wat mooi is inhou - vreugde, vrede, voorspoed en geluk. Geniet die dag.

Hello almal

Ek het darem 'n kansie gekry om gou 'n paar foto's op te sit. Dit gaan goed hier. Skoonpa het maar op en af dae. Hy het Dinsdag huis toe gekom. Is nog swak, Johan moet hom help om op te staan. Ek glo elke dag sal nou beter gaan.

Baie dankie vir almal wat ons gedink het. Ons waardeer dit baie.

Net om vir julle almal te wys, Johan is lekker besig hier.

Ons het gister gou vir ouma Hettie en ouma Issie op die plot gaan hello se. Hulle lyk baie goed. Ons het lekker saam met oom Frans en tannie Rens ook gekuier. Ouma Hettie en ouma Issie stuur baie liefde en groete vir julle daar in New Zealand.

Ek sal probeer om kort - kort 'n bietjie foto's op te sit. Het nog nie veel geneem nie.

Liefde en groete vir julle almal daar.

Ruben en Oupa

Ruben en Oupa het met die klein helikoptertjie gevlieg. Hoog, hoog op in die lug en oor die huis se dak. Een keer het die helikoptertjie op die dak geland. Oupa kon hom nie gaan afhaal nie - die leer was te kort. Ruben, glad nie bang nie, is op die dak getel en het die koptertjie gaan afhaal. Wat die twee nie nog sal aanvang nie!!!!!

Die afgelope naweek vanaf Oujaarsdag af, het Hekkie vir ons op die plaas kom help. Hulle het vanaf verlede Donderdag tot gister (Woensdag) gekuier. Ruben wou glad nie saam met - wie ookal die gras by hulle huis gesny het - op die grassny trekkertjie ry nie. Oupa Pieter het ons gras gesny en hy was vinnig by om saam met Oupa op die trekkertjie te ry. Partykeer lyk dit vir my Oupa Pieter kry nogal baie met hom reg. Hy het ook verlede seisoen toe ons op Pouakani gewerk het, baie saam met Oupa op die trekker gery. Nou kry hy nie meer die geleentheid om trekker te ry nie. Dit was ook weer vir hom lekker om saam met Oupa in die groot trekker te ry en kalk te strooi op die paddocks. Ek is seker hy het die kuier baie geniet.

Ruben sing vir ons.

Verjaardagwense

Megan Agenbach het 4 Januarie verjaar. Baie geluk, Megan. Hoop jy het die dag baie geniet en is baie bederf.

Carl Meyer het 5 Januarie verjaar. Baie geluk, Carl. 'n Mooi jaar word jou toegewens. Hoop jy het die dag baie geniet.

Carina Meyer verjaar vandag. Baie geluk, Carina. 'n Baie mooi nuwe lewensjaar word jou toegewens, vol vreugde, voorspoed en geluk. Geniet die dag.

Vandag is ook die verjaarsdag van Tinus Buitendag. Baie geluk, Tinus. Mag die nuwe lewensjaar geluk en vreugde inhou. Geniet die dag.

Verjaardagwense

Dit is maar sleg as 'n mens so vroeg in die nuwe jaar al laat is met verjaarsdagwense.

Gister was die verjaarsdag van Thinus Jacobs. Baie geluk, Tinus. 'n Baie mooi nuwe lewensjaar word jou toegewens. Mag al jou kinderdrome waar word. Hoop jy is gister baie bederf en dat jy die dag baie geniet het.

André Botha het ook gister verjaar. Ook vir jou wens ons 'n baie mooi nuwe lewensjaar toe.

Marijke Nel het ook gister verjaar. Baie geluk, Ounooi. Mag die nuwe lewensjaar vir jou ook alles wat mooi is inhou. Hoop Pappa en Mamma het jou baie bederf.